又烦年终奖顺水鱼财经

陈嫚 职员

春节就快到了，除咗返屋企嘅车票之外，依家全国人民最关注嘅就係年终奖了。虽然呢个话题毫无新意，但係正所谓“年年岁岁奖相似，岁岁年年钱唔同”，大家辛苦一年，无非就係为咗幸幸福福开开心心过个好年啧，年终奖梗係重要喇。

呢几日，网友最钟意做嘅就係晒年终奖，不过，依家唔单止兴晒富，更加兴晒穷，比边个嘅年终奖最少最寒酸，写嘅人义愤填膺，睇嘅人兴致高涨，当事者借此发泄自己嘅怨气，而本身对年终奖不满嘅人睇到有人比自己仲悲惨之后可以从中寻求安慰。所以，虽然网上呢啲帖子都係老调重弹，但依然人气高涨。

前日，一位朋友同我倒苦水，佢今年竟然冇年终奖，老细同每个员工发一台iPad代替年终奖。虽然佢一直都想要部iPad，依家卒之梦想成真了，但佢却一啲都唔高兴置年货、派利市、孝敬父母，样样都要钱，单靠一个月工资实在难以为继，最后，经过再三思量，佢将嗰部iPad卖咗折现。为此，佢喺我耳边噏咗三日：曾经有部我一直想要嘅ipad摆喺我面前，但我冇能力珍惜，人世间最痛苦嘅事莫过于此……至今年终奖仲冇乜嘢眉目嘅我听咗之后，更加寝食难安。

近两日，网上热传一份国内各大城市人均年终奖排行榜，其中，广州排第四，人均年终奖係4486蚊，虽然唔知数据出处，但係个个网友都忍唔住以此为尺自我量度。朋友，你有冇拖大家嘅后腿啊？